فنَّد المتحدث الرسمي لنادي الزمالك أحمد سالم، كواليس انسحاب الفريق أمام الأهلي في القمة، واسباب التراجع لاستئناف بطولة الدوري المصري هذا الموسم.
وقال سالم عبر قناه اون تايم سبورتس : "في حاجه اسمها علم التفاوض والزمالك عمل بيان بطلبات بانت للناس أنها تقيله اوي علشان الكل يركز وينتبه ليها وده كان مقصود".
اقرأ أيضا
الزمالك يمطر شباك سيراميكا كليوباترا برباعية في الدوري المصري
عضو الزمالك يتحدى اتحاد الكرة بتصريح خطير.. ويفاجئ الأهلي
وواصل: "تعالى ناخد طلبات البيان بند بند .. الأول وهو كان التحقيق مع الحكام وإيقافهم والكلام ده اتبلغنا بيه خلاص من يومين كمان خدنا ضمان أن بيريرا مش مكمل الموسم الجاي".
وتابع: "البند الثاني واللي عمل ضجه بخصوص أنه تيجي لجنه من برا تعمل الجدول ده كان مقصود علشان نوصل رساله أننا مش واثقين في اللي عمل الجدول.. طيب خدنا ايه أنه الموسم الجاي الانديه كلها هتشارك في وضع الجدول".
واستطرد: "فيما يخص اعلان جدول الدوري واللي كان مركون في الرف .. أعلن بعد مباراة القمه بالكامل وده مطلب كمان اتحقق".
واردف: "البند الاخير واللي عليه اللغط كله هو عدم استكمال مباريات الدور الثاني قبل الأول والناس كلها مسكت فيه وكأن ده كان ازمه للزمالك.. الأمر ده مكنشي المقصد احنا خدنا 3 طلبات من 4 وعلشان كده لعبنا مباراة سيراميكا كليوباترا".
وأكمل سالم: "الزمالك قبل كده لما قال مش هلعب السوبر مخدش حاجه بعدها وقبل كده برضوا مباراة مصر المقاصة مخدش حاجه بعدها، لكن المره دي اخدنا مطالبنا الفتره الجايه.. هل موضوع إنه ميتلعبش الدور الأول؟ يستحق اننا ننسحب من الدوري؟ وفي مطالب أخرى خدناها؟•
وختم تصريحاته: "لحد مباراة الأهلي ماخدناش تأكيدا على مطالبنا، وكنا هنلعب لو اتحققت لكن محصلش ده وجدول الدوري أعلن بعدها وكذلك تحويل الحكام للتحقيق وغيرها• كنا نتمنى نلعب مباراة الأهلي، ليه منلعبوش دا أهم مباراة في السنة كلها".
